Chi semmo

O nòstro campo o l’é o digitale inte tutta a fòrsa do termine.
Into nòstro nomme gh’é un ponto fermo e unna vixon do futuo, perché beseugna tegnî conto che inte ste cöse cangia tutto de maniman, da un sô à l’atro.
L’é dex’anni che travaggemmo co-a convinçion che un o l’à delongo quarcösa da imprende, de öcaxoin pe fâ megio, pe mette in discuscion e seu seguesse.

Niatri semmo de l’idea che sta chì a segge a mainea boña d’aggiuttâve à deuviâ a-o megio e tecnologie che fan giâ o mondo a-a giornâ d’ancheu. Da-o web a-e app, da-i software che î fan camminâ fin a-e creaçioin artistiche che de sti tempi son a frontea a ciù avansâ do multimedia.

Te ô lì, derê à tutte ste cöse ghe semmo niatri, quelli di ritræti: o ligamme [l’interfaccia] tra o futuo e a realtæ da giornâ d’ancheu.

O l’è tempo de App

E app son apreuvo a cangiâ o nòstro mondo. A poscibilitæ che ne dan d’intrâ inti nòstri programmi tutti i momenti, donde e quande se n’à de beseugno e co-i dispoxitivi che un o l’à con lê: pe quello e app son unna mäveggia pe-o travaggio in scî mercoei, pe savei e cöse, pe demoâse. Un mezo inandiou apòsta pe quello che serve.

L’é za do bello che semmo di meistri à inandiâ e à mette sciù e appricaçioin che cuan e che dan a mente a-o travaggio de industrie ò di restoranti, quelle che stan apreuvo a-i scistemi informatizzæ e a-e ræ, quelle che fan mette à giorno in sciô momento i dæti che s’à beseugno.

Ma semmo meistri ascì inte appricaçioin che ve dan à viatri, e nòstre casañe, o mezo d’intrâ e de mantegnîve in relaçion co-e vòstre, de casañe, e d’attrovâne de atre.

O l’é un regio ch’o cangia tutti i momenti: pe dâghe delongo apreuvo ghe mettemmo o nòstro tempo e e nòstre fòrse, che l’é comme dî a creativitæ e a competensa into settô de l’informatica di nòstri òmmi e de nòstre dònne.

Web, a ræ a l’é libertæ

Unna vòtta gh’ea i coscì diti sciti veddriña. Ean comme de brosciue, ma sensa papê e sensa costi de stampa: servivan pe fâ conosce unna dita ò un serviçio. A-a giornâ d’ancheu un scito o l’é tutta unn’atra cösa, gh’è ciù travaggio e ciù informaçion. Segondo niatri o l’è un mezo ch’o serve à mette in libertæ de fòrse, à mette in atto de idee che donca arrestavan serræ inta cantia.
Un scito web o no saià guæi bon s’o no nasce da l’incontro tra a casaña e a sò agençia, che stabiliscian insemme, e fin da-o prinçipio, quello che beseugna fâ pe arrivâ donde se veu, coscì da inandiâ a-o megio l’architettua e i contegnui do mæximo scito.

O Web o l’é a scintexi d’unna mainea digitale de pensâ o travaggio e a communicaçion, o l’é a cogniçion de comme tutti i momenti cangia a lengua de imagine e o lescico, o l’é conoscensa da pscicologia de persoñe.
Un scito, aloa, o l’é tante atre cöse a-o de là da presentaçion e da lengua ch’o deuvia, o no l’è solo un mezo pe dî e cöse fito e ben, o no l’é solo un bello spaçio elettrònico pe fâ di commerci.

Un scito, a-a giornâ d’ancheu, o l’é esprescion da vòstra identitæ.

Programmi taggiæ in sce mesua

Ascì into mondo digitale, con tutta a seu tecnologia, gh’é tanto spaçio pe-i artexen. Tutto sta, se capisce, à capî quello che s’intende con sta definiçion.
Pe dîne uña, s’inandiemmo e se mettemmo sciù da niatri i software che “informan” i sciti, e i produti digitali ch’exibimmo a-e nòstre casañe. Di software fæti in sce mesua, taggiæ in sciâ persoña: di software che pròpio pe quello no son a mæxima cösa de quelli tutti pægi che s’attreuvan in gio. A l’é uña de cöse che ne fan differenti da-i atri, e a vëgne feua da-a mainea de travaggiâ ch’emmo delongo tegnuo.
Coscì, quelli che travaggian con niatri san che peuan contâ in sce un intelocutô ch’o s’accapisce e ch’o ghe tegne à quello ch’o fa, e ch’o no l’à atro inta testa.

Coscì comme un sartô o piggia e mesue a-a seu casaña, a-a mæxima mainea niatri demmo a mente a quello che gh’é inte ’na dita, e dapeu ghe femmo o scito adòsso comme un vestî.

A no l’é costion de spende ciù dinæ, ma de spendili megio.

Multimedia, l’arte de cangiâ in megio

O multimedia o l’è un spaçio delongo in espanscion. Niatri, l’é pe coscì ch’ammiemmo comme i scistemi se parlan e combaxan tra de lô, pe poei dâ a-e nòstre casañe de idee che ghe fassan guägnâ a partia e che ghe pòrtan de novitæ, tanto inte l’imagine comme into profito.

O bon incontro tra unn’impreisa e e persoñe co-e quæ a veu avei da fâ o l’é un valô ch’o se domanda delongo de ciù, inte fee, into mondo de l’arte, inte butteghe e fiña inti club.

Multimedia o veu dî delongo de ciù riescî à “sentî” a realtæ de cöse inte tutto o seu ëse.
De tecnologie a-o serviçio di nòstri sensci e de emoscioin che poemmo fâ vive. E dâ un valô ancon ciù fòrte a-a vòstra imagine. À savei cangiâ in megio, se ghe guägna delongo. E intanto, se capisce, semmo apreuvo à inandiâ ascì di zeughi e de forme de promoçion animâ pe tutti i tipi de spaçi, web, mòbile, social network, e de presentaçioin in multimedia de quelle ciù chi core.

Perché quello che voemmo fâ, o l’é aggiuttâve a communicâ inta megio mainea.